Horixe adierazi zen Elkargik Donostiako Kursaalen bere Bazkideen Batzar Orokorraren ostean egin zuen enpresa topaketan. ´´Aldaketa handiak egin behar ditugu gure ongizateari eutsi nahi badiogu eta euskal enpresa nazioarteko erreferente izan dadila nahi badugu´´.
Zein egoeratan dago euskal enpresa ingurune ekonomiko eta finantzario honetan eta zeintzuk dira etorkizunerako aurreikuspenak? Horra hor Elkargik esparru ekonomiko, finantzario eta akademikoko hiru adituri egin zien galdera.

 
GUILLERMO DE LA DEHESA
Londresko Centre for Economic Policy Research-eko presidentea
´´Pozik egon gaitezke 2008an ehuneko 1,8ko hazkundea badugu ´´
Nazioarteko krisialdiaren jatorria azaldu ondoren, Guillermo de la Dehesak gogorarazi zuen nazioarteko krisi hau Espainiako hazkunde ziklo handienaren azken fasean iritsi dela. ´´ ehuneko 3,5 hazi gara 14 urtez. Krisialdirik egon ez balitz ere, gutxiago haziko ginatekeen´´.
De la Dehesak Nazioarteko Moneta Funtsaren aurreikuspenen berri eman zuen. Hala, NMFren aurreikuspenen arabera, Espainiako hazkundea ehuneko 1,8koa izango omen da 2008an eta ehuneko 1,7koa 2009an. ´´Pozik egon gintezke hala bada´´, dio de la Dehesa jaunak. ´´ehuneko 1,8ko hazkunde horrek nabarmen gainditzen du euro guneko ehuneko 1,4a. Gainera, 2009aren amaieran, ekonomia suspertu egingo dela pentsatzen dug´´.
´´2008 eta 2009an enplegua hazi egingo da, eta 2009an langabezia ehuneko 11 ingurukoa izango da goitik jota´´.
Datu baikor hauek azaltzeko, de la Dehesak Espainiako ekonomiaren alderdi ´´sendoak´´ azaldu zituen: ´´aurrezkia BPGren ehuneko 21ekoa izan da azken urteotan, beraz, ez da ia batere jaitsi. Gainera, etorkinei esker lan merkatua malguago bihurtu da, izan ere, etorkinak lana dagoen lekura joaten dira eta hori oso positiboa da´´.
850.000 etxebizitza bukatuta daude baina saldu gabe. Logikoa litzateke prezioak jaistea merkatua lehengo senera bueltatu dadin.
Bukatzeko adierazi zuen Espainiako ETEek ez dutela zor handiegirik. ´´Nire ustez, Espainiako enpresa handiek ondo inbertitu dute eta horrek esan nahi du arazo handirik gabe ordainduko dituztela beren kredituak´´.

 
ALEJANDRO RUELAS-GOSSI
Orkestrako (Lehiakortasunaren Euskal Institutua) zuzendari nagusia
´´Euskadin ez dugu nahi ez globalizatzerik ez berritzerik´´
Alejandro Ruelas-Gossiren ustez kezkagarria da ETEek zor gutxi izatea: ´´Kezkatu egiten nau, zeren arrisku gutxi hartzen dutela esan nahi baitu horrek´´. Asko aldatu behar dugu, euskal enpresa nazioarteko eredu izango bada.
Ruelas-Gossiren hitzaldiak enpresen leit motivak izan zituen ardatz: ´´Saltzea irangarria iruditzen zaigu. Onena litzateke erosleak geuregana etortzea gure produktua erostera´´. Ruelas-Gossik azaldu zuen ´´tristea´´ dela Euskadiko ´´enpresak gero eta txikiagoak izatea´´. Izan ere, bere iritziz, tamaina garrantzitsua da, zeren zenbat eta handiagoa izan enpresa, hainbat eta gehiago globalizatuko da eta hainbat eta gehiago berrituko du. Horrela beraz, ´´enpresa txikiak abiapuntua izan behar du, baina inola ere ez jomuga´´.
Orkestrako zuzendari nagusiak adierazi zuen lehiatzeko ez dagoela industri ehuna birmoldatu beharrik, baina hori bai, ´´sofistikatu egin behar dela. Hau da, hemen ekoizten den altzairua ez dadila ate batentzat izan, ezpada kohete espazial batentzat. Kontua ez da industri ehuna aldatzea, baizik eta lanpostu bakoitzak balio gehiago sortzea´´.
Gurea ez da hazten ari den ekonomia bat, baizik eta gutxien hazten ari dena», azaldu zuen.

 
PEDRO LUIS URIARTE
Innobasqueko (Berrikuntzaren Euskal Agentzia) presidentea
´´Ez badugu erreakzionatzen hurrengo belaunaldia ez da gu bezala biziko´´
´´Lehen autonomi erkidegoa izan gara berriro ere per capita BPGri dagokionez, badakigu kudeatzen eta administratzen, sektore publiko eta pribatuaren arteko aliantzak oso positiboak dira, enpresa, finantza eta merkataritza gaitasun handia daukagu eta 2007an gure kontu korronteko balantzak superabita erregistratu du´´. Baina hori esandakoan, Innobasqueko presidenteak gauzak argi utzi zituen: ´´egoera oso onean bagaude ere, ez daukagu etorkizuna segurtatuta. Txipa aldatu behar dugu. Globalki pentsa behar dugu, pertenentzia sentimendua galdu gabe ´´.
´´Euskadiko ekonomiaren erantzuna ez da behar adinakoa ez eta eraginkorra ere´´, azpimarratu zuen.
Gauzak dauden moduan daudela, Innobasqueko presidentearen ustez ezinbestekoa da gertatzen ari diren ´´ikaragarrizko aldaketei´´ egokitzea egungo ongizate mailari eutsi ahal izateko. ´´EAEko bigarren eraldaketa ekonomikoari ekin behar diogu´´, eta bigarren eraldaketa horren ardatz nagusia berrikuntza da. ´´Berritzea da enpresa eraldatuz balioa sortzea´´, azaldu zuen Pedro Luis Uriartek. ´´2030erako berrikuntzako erreferente izan nahi dugu Europan (Euskadi une honetan 55. postuan dago Europako eskualdeen artean)´´. Helburu hori lortzeko, Uriartek ´´EAEko estrategiak eta aurrekontu lehentasunak berrikusi eta aliantza publiko-pribatua indartu behar dela´´ adierazi zuen.

 
Donostia DV