 |
|
Juan Luis
Klein-ekin izandako topaketaren irudia.
|
Zer da zuentzat berrikuntza soziala?
Duela gutxira
arte berrikuntza teknologikoa edo prozesuetako berrikuntza bakarrik ezagutzen
genituen, baina esan liteke berrikuntza sozialak den-denak biltzen dituela,
pertsonek pertsonentzat egiten
dutelako eta berrikuntza sozialak erronka sozialei erantzuten dielako. Ezin
azaldu daiteke alderdi teknologikoa edo ekonomikoa alderdi soziala kontuan
hartu gabe. Ezin ditugu baloreak edota jarrerak aldatu pertsonak kontuan hartu
gabe. Ezin dugu teknologia bultzatu pertsonek teknologia horretan konponbide
bat ikusten ez badute. Quebeceko Unibertsitateko Juan Luis Klein-ekin egin
genuen topaketan norbaitek esan zuen hori hala bada, dena dela berrikuntza
soziala, eta baliteke hala izatea. Agian ez genioke abizenik jarri behar
berrikuntzari, pertsonak erdian egon behar baitu; bestela, eten sozial asko izango
genituzke, hala nola desberdintasunak, bidegabekeria sozialak eta desorekak. Bizi-kalitate
ona izateko zahartzea eta immigrazioa bezalako erronkei erantzun behar diegu. Hau
da, arazoak konpontzeko modu desberdinak aurkitu behar ditugu eta asko geratzen
zaigu egiteko.
Eta nola bultzatzen duzue berrikuntza soziala zuen
unitatetik?
Guretzat berrikuntza
soziala ingurunearekiko elkarrizketan oinarritzen da. Gure balio-katea ikerketa
aplikatuarekin hasten da; oinarrizkoa fakultateetan irakasten da, baina guk ez
dugu aldizkari zientifikoetan artikulurik idatzi nahi edo ezagutza teorikorik
sortu nahi. Beste norabide bat eman nahi diogu gure ikerketari, konponbidea
emateko gaur egungo erronka edo arazo sozial bati. Fakultateek ez bezala,
hezkuntza ez arautua lantzen dugu gai sozialen inguruan: jakintza
transferitzeko jarduerak, ikastaroak eta beste hainbat ekintza garatzen ditugu
gai sozialekin sentsibilizatzeko. Azkenik, enplegagarritasuna jorratzen ari
gara unibertsitateko beste zentro batzuekin, ekintzailetza soziala bultzatuz
eta Deustun lehendik dagoen berrikuntza eta ekintzailetza unitateari lagunduz.
"Alderdi
ekonomikoari ezin zaizkio kendu alderdi soziala edo ingurumena"
Zein proiektu dauzkazue martxan?
Azken urte
honetan informazio teknologiei eta berrikuntza sozialari buruzko Fundación Vodafone Fundación Deusto
katedra sortu dugu. Normalean teknologia sortzen da kontuan hartu gabe zein premia
sozial dagoen, hau da, pertsonek zertarako beharko duten galdetu ere egin gabe,
eta katedra honek horixe landuko du, hots, gizarteari entzungo dio bere premiak
zeintzuk diren jakiteko. Hedapenari
dagokionean, maiatzean Luis Rojas Marcos ekarri genuen erresilientziaz eta
baikortasunaz hitz egiteko, pertsonak
emozioak baikara %80an eta uste dugu unibertsitatean gaitasun
emozionaletako prestakuntza hori ere bultzatu behar dugula.
Duela gutxi
Garellanoko Master Planean parte hartu dugu Bilbao Ría 2000 erakundearekin
batera. Ahalegina egin genuen hirigintzari eduki soziala emateko, ez dadin
arkitektura soila izan, eta ikerketaren helburua da aztertzea zein eragin
(soziala eta ingurumenekoa) izango duten ekintzek lurraldean. Bestalde,
Mondragon Unibertsitatearekin eta EHUrekin batera Euskadiko 4. sektorea aztertu
dugu, jakiteko nola gauden xede sozial argia eta emaitzen kontua duten enpresei
dagokienean. Orain txostena idazten ari gara.
"Ekintzailetza
soziala bultzatu nahi dugu katearen fase guztietan"
Urriaren amaiera aldera hitzarmen bat sinatu zenuten
Quebeceko Unibertsitatearekin, zertan datza hitzarmen hori?
Funtsean,
berrikuntza soziala bultzatu nahi da, irakasleak, ikerlariak eta ikasleak
trukatuz. Abian jarri nahi ditugu ikerketa proiektu bateratuak, ikerketarako
egonaldiak Bilbon, Donostian eta
Quebecen, eta lantzen ari garen txosten bateratuak argitaratu nahi ditugu. Hitzarmenean
Innobasque-k ere parte hartzen du,
eta berrikuntza agentzia horren bitartez plataforma bat bultzatuko dugu
berrikuntza sozialarekin zerikusia duten kolaboratzaileen sare bat sortzeko. Esaterako,
berrikuntza sozialaren arloan lanean dihardugun guztiok ahalegina egingo dugu Kanadan
erabiltzen ari diren metodoak eta egiten ari diren proiektuak ezagutzeko. Dagoeneko
elkarrekin ari gara lanean, baina hitzarmen honen bidez ofizialtasuna eman
diogu lankidetzari.
Zergatik aukeratu duzue Quebeceko Unibertsitatea?
Berrikuntza
sozialak ikertzen dituen CRISES
zentroa daukalako. Innobasque-k eta Deusto Innovación Social erakundeak
azterlan bat egin genuen berrikuntza agentziei buruz. Ikerketa esperientzia batzuk
aztertu ondoren CRISES nabarmendu zen ingurunearekin lotutako ikerketari
dagokionean, bere eskualdearen eraldaketa sozialean eragina izaten ari diren
proiektuak dauzkalako. Interesa genuen beraz CRISES zentroko norbait ekarri eta
bere esperientzia konta zezan, berrikuntza sozialeko munduko zentro
unibertsitario garrantzitsuenetakoa baita.