 |
|
Robert Rasmussen Donostiako Lego Serious
Play tailerrean.
|
Zergatik laguntzen dute Lego piezek sormena sustatzen? Ba
al du zerikusirik haurtzarora itzultzearekin?
Uste dut
funtzionatzen duela jokoan eskuak erabili behar direlako. Haurrek den-dena
ukitzen dute mundua esploratzen ari direnean, dena manipulatu eta sentitu nahi
dute, eta halaxe bururatzen zaizkie ideia berriak. Eskuak erabiltzea
lagungarria da pentsatzeko, mundu errealean zerbait eraikitzen ari zarelako. Eskuak
lanean ari diren bitartean, burmuinean zerbait konektatzen da. Ideiak baino ez
dauzkagu buruan, Lego piezez betetako kutxa handi bat balitz bezala, baina
pieza edo ideia horiek konektatu egin behar dira. Hori baino askoz konplikatuagoa
da kontua, baina informazioa ematen duten pieza horiek hobeto konektatzen dira
mundu errealean zerbait eraikitzen ari garen bitartean. Eskuak erabiltzean
ideiak ere mugitu egiten dira. Beste zerbait erabil liteke Legoa erabili beharrean,
baina Lego piezak sistema batean oinarrituta daude eta pentsatuta daude modu
orokorrean eraikitzen hasteko eta denbora gutxian bakarra den zerbait lortzeko.
Ideia hau 90eko hamarkadaren amaieran sortu zen, aldatu
egin al da metodologia urte hauetan?
Lego Serious Play
sortu genuen ideia ona iruditu zitzaigulako, baina praktikan jarri genuenean
konturatu ginen benetan funtzionatzen zuela eta lagungarria zela jendearen
sormena kanporatzeko, pentsarazteko eta beste modu batean komunikatzeko. Orduantxe
galdetu genion geure buruari zergatik funtzionatzen ote duen. Ikuspuntu
zientifikoago batetik ikertu genuen zer gertatzen den hitz egiten eta entzuten
duzun bitartean eskuekin jolasean eta zerbait eraikitzen bazabiltza. Gero
metodologia bat garatu genuen optimizatzeko, hau da, jendea inplikarazteko eta
ahalik eta probetxu gehiena ateratzeko.
Lego Serious
Play metodologiaren bidez erakundeko pertsona guztiek parte hartzen dute
arazoen konponketan. Zuzendaritza-karguek benetan onartzen dute hori ala
teorian bakarrik?
Batzuk mehatxatuta
sentitzen dira. Baina buelta eman behar zaio egoerari eta pentsatu behar duzu
etorkizunean lehiatu nahi baduzu, pertsonei barruan duten guztia atera behar
diezula eta zeure buruari galdetu behar diozu zer egin behar duzun zure
erakundeko pertsonen ideia guztiak eta sormena kanporatzeko. Horrexetan datza
gakoa, pertsonek zenbat eta gehiago lagundu, orduan eta lehiakorragoa izango
zara. Badaude horrekin gustura sentitzen ez diren zuzendaritza-karguak, eta
seguruenik ez zaie interesatuko Lego Serious Play metodologia. Baina
enpresaburu arrakastatsuenek badakite arrakasta lortzeko talde osoa inplikatu
behar dela eta pertsonak direla erakundeko balio preziatuena. Giro berezi bat
sortu behar da jendea seguruago egon dadin eta parte hartzeko gogoa izan dezan.
Esan genezake pertsonak ustiatzeko modu bat dela, baina proiektuaren partaide
bihurtuz eta proiektuaren zati direla sentiaraziz.
"Ideiak
azkarrago konektatzen dira mundu errealean zerbait eraikitzen ari zarenean"
Nola funtzionatzen du metodologiak praktikan? Eman
diezagukezu adibideren bat?
Orain dela gutxi
tailer bat antolatu nuen enpresa batekin. Enpresa horretan erdi mailako 22
arduradun eta liderren talde txiki bat zeuden. Asko hazi dira eta jende berria
kontratatu dute, eta orain beren jarduteko modua aldatu nahian dabiltza. Erdi
mailako arduradunek erabaki gehiago hartu behar dituzte, hau da, erantzukizun
gehiago dute, baina ez dakite zehatz nora jo eta oso zapuzturik daude. Lego
tailerrean erdi mailako arduradunei esan genien negozio bat sor zezatela beren
gaur egungo ikuspegitik, eta negozioaren alderdi on eta txar guztiak nabarmen
zitzatela. Gero esan genien eraiki zezatela negozioa hemendik eta bi urtera
izan beharko lukeen funtzionatzeko moduarekin, beren helburuak bisualiza
zitzaten. Hala, mahai gainean ikusi zuten zer aldatu beharko luketen. Tailerreko
lehen egunetik argi zekiten zer egin behar zuten: "badakizkigu zeintzuk diren
bakoitzak sumatzen dituen arazoak, beraz, konpon ditzagun". Elkarri ulertzeko
eta elkarrekin lan egiteko modu bat da.
Interesgarri
gerta dakizuke: