Anya Kamenetz idazleak Fast Company aldizkarian uda honetan
argitaratutako artikulu
batean esan zuen TED topaketak nazioarteko
unibertsitate ospetsu baten pareko hezkuntza instituzio bilakatu direla. Eraikinik,
ikasgairik edo titulurik gabeko zentro birtualak dira, non mundu osoko buru
argi zenbaiten hitzaldiak entzuteko aukera eskaintzen baita.
Duela urte
betetik, hainbat hiritan antolatzen dira TEDx
topaketak. Modu xume eta independentean antolatzen badira ere, "merezi duten ideiak
hedatzeko" filosofiari jarraitzen diote. Azaroaren 27an, Bilbok bat egingo du mota honetako topaketak
hartzen dituzten hiriekin (Estatu mailan Madril
eta Bartzelonan ere ospatu dira). Bilboren
kasuan, hitzaldiak hezkuntzari buruzkoak izango dira, baina hezkuntza kontzeptu
zabal eta transbertsal modura aztertuta. Jorge García del Arco, talde antolatzaileko kide den
ekintzaileak azaldu duenez, "ez dugu gaia klasikoki landuko, TED estiloan
baizik, hau da, kontzeptua mutur desberdinetaraino eramanaz"; "Karen Hill
Scottek Disney eta Discovery Channel kateekin lan egin du eta Crystal Stairs
GKEa fundatu du eremu marjinaletako haurren garapenean laguntzeko". Hill Scott izango
da topaketan parte hartuko duen hizlarietako bat, baina beste hainbat ere
badaude, hala nola, Peter
Van Dommele, zaldiekin coaching saioak egiten dituen enpresa bateko
zuzendaria eta Paul
Natorp, ekintzailea eta Kaos Pilot
zentroko irakaslea.
Parte-hartzaileen
zerrenda oraindik osatzeko dago, baina esparru lokaleko pertsonek ere parte
hartuko dute. Antolatzaileen helburua lider ikusezinak bilatzea da. Jorge Garcíak
esan bezala, "hedabideen arreta handirik bereganatu ez duten arren gauza
interesgarriak egiten ari diren pertsonak gonbidatu nahi ditugu; bestela beti
hizlari berdinengana jotzen dugu, eta zer esan baduten beste hainbat pertsona
ere badaude". Antolatzaileek xake maisu gazte baten gurasoak gonbidatu nahi
izan zituzten, baina azkenean ez da posible izan.
Topaketa Bilboko
Eliseo Zelaiak Antzokian ospatuko da eta, plaza kopurua murritza bada ere (ehun
lagun inguru), hitzaldiak Internet bidez ikusi ahal izango dira. Antolatzaileek erabaki dute hitzaldi
guztiak ingelesez egingo direla. Jorge Garcíaren esanetan, "eztabaidari irekita
dagoen gaia bada ere, gure ustez garrantzitsua da ikusgarritasun handiagoa
lortzea eta topaketako ideiak inportatzeko zein inportatzeko modukoak izatea".
Interesgarri
gerta dakizuke: