2011n
lehen aldiz ordenagailu pertsonal baino sakelako telefono adimendun gehiago
saldu ziren. Datu horrek Interneteko sarbidean eman den joera aldaketa islatzen
du, izan ere Sarea agertu zenetik sarbide nagusia PCa izan bada ere, gero eta
gehiago dira sakelakotik sartzen diren erabiltzaileak. Telefónica
Fundazioak Informazio
Gizarteari buruz egiten duen urteroko txostenean agerian geratu da Internet
mugikorraren hazkundea izango dela etorkizuneko hamar giltzarrietako bat. Joera
hori bereziki nabarmena da Estatu mailan, Europako batez bestekoa gainditu
duelarik (Espainian telefono mugikorraren bidezko sarbidea %20koa da eta
Europan %11koa).
Txostenaren
arabera, erabilpenak ere aldatzen ari dira. Internet beti egon da
aisialdiarekin lotuta, baina 2011. urtean asko hazi dira produktibitate profesionalarekin
eta pertsonalarekin lotutako jarduerak. Hazi egin dira prestakuntza ikastaroak,
administrazio publikoekiko tramiteak, erosketak eta informazio kontsultak eta
bere horretan mantendu da ikus-entzunezko edukiak kontsumitzeko egiten den
erabilpena.
Zentzu
horretan, azpimarratu behar "jabetzatik sarbiderako" joera aldaketa bat eman
dela, izan ere hiritarrentzat dagoeneko ez da hain garrantzitsua eduki bat
edukitzea, nahiago baitute edonondik eskuratzeko aukera izatea. Beraz, asko
zabaldu dira streaming bidez edo lainoan funtzionatzen duten zerbitzuak eta
aukera berriak zabaldu dira eduki kontsumora bideratutako negozio ereduei
dagokienean. Txostenak dioenez, ordainpeko ikus-entzunezko eduki edo musika
zerbitzuak gero eta ugariagoak dira (esaterako Netflix edo Spotify), zeintzuek
sarbidea emateaz gain, erabiltzailearen esperientzia hobetzen baitute.
Beste
joera bat erabiltzaile kategoria berri bat agertu izana da, "etengabeko
komunikatzailearena" hain zuzen. Izenak berak dioen bezala, etengabeko komunikatzailea
uneoro konektatuta egoten da
denbora errealean eta intentsiboki erabiltzen du Sarea. Hala, sare sozialak
komunikatzeko eta edukietara iristeko tresna bezala finkatu dira batik bat
gazteen artean, eta beste pertsona batzuekin komunikatzea da gaur egungo
entretenimendu berria.
Globalki,
Internet erabiltzaileen kopuruak gorantz darrai, eta 2011n 2 mila milioitik
gora izan dira. Hazkunde handiena garapen bidean dauden herrialdeetan eman da, batez
ere mugikorraren bidez, zeren Internet konexioa duten etxe kopurua ozta-ozta
iristen baita %15era.
Interesgarri
gerta dakizuke: