Gehiago gutxiagorekin, eskala txiki eta handiko eredu iraunkorrak

Munduko Ekonomi Foroak More with less, scaling sustainable consumption and resource efficiency txostena argitaratu berri du, non ekintzarako deia egiten baitu garapen eredu berriak bilatzeko. Eredu horien bidez hazkundearen eta baliabide urriak kontsumitzearen arteko lotura hautsi behar da, gaur egungo egiturak eta produkzio sistemak  sostengaezinak izango direlako etorkizunari begira. Txostenean jasota dauden Oxford Economics erakundearen datuen arabera, 2 bilioi dolar baino gehiago daude jokoan, hau da, 2030ean baliabide eta energia kontsumoa murrizteak suposatuko lukeen aurrezkia.

MEF erakundearen Sustainable Consumption ekimenak hiru ekintza ildo proposatzen ditu:  kontsumo ohitura iraunkorragoak sustatzea hiritarren artean, produktu edo zerbitzu iraunkorrak aukera lehenetsi bihurtuz; negozio eredu berriak bultzatzea eta joko arauak aldatzea akordio publiko-pribatuen bidez.

Kontsumitzaileei dagokienean, eten bat dago jarreren eta benetako ekintzen artean. National Geographic-ek Europan eginiko galdeketa baten arabera, inkestatuen %72 prest legoke produktu ekologikoen truke gehiago ordaintzeko, baina %17k baino ez ditu produktu ekologikoak erosten. Arrazoiak bat baino gehiago dira: etiketa berde kopuru handiak sortzen duen nahasmena, prezioa eta gardentasun falta. Bestalde, enpresa ideiei dagokienez, egia da iraunkorragoak diren ekimen asko dagoela, baina Munduko Ekonomi Foroaren txostenak adierazten du gaur egun arazo nagusia eskala falta dela, azpiegitura eta teknologia baliabideak urriak direlako eta baita ere inertzia gaiztoak indartzen dituzten joko arauekin jokatzen dugulako. Aipatzekoak dira, esaterako, erregai fosilei ematen zaizkien diru-laguntzak edota zerbitzu nahiz produktu iraunkorren eta gainerakoen artean bereizketarik egiten ez duten tarifak.

Etorkizun txiki eta irekia

Berrikuntza sozialeko Ezio Manzini adituak ekimen txiki, lokal, ireki eta konektatuz osatutako etorkizuneko eszenatokia proposatzen du, kontsumoa murrizteko enpresa proiektuekin batera. Manzini-ren esanetan, munduan badira hainbat proiektu garapen eredu alternatibo eta iraunkorragoak probatu dituztenak, esaterako, nekazaritza produktuak kontsumitzeko kooperatibak, adinekoak zaintzeko elkar laguntzarako taldeak edota Interneteko plataformen bidez produktuak eta zerbitzuak partekatzeko sistemak. Politecnico di Milano unibertsitateko irakasle honen ustez, ekimen horiek txikiak eta zehatzak izan behar dute, "giza eskalara diseinatutako sistemak" alegia. Horrez gain, SLOC (small, local, open eta connected hitzen siglak) eszenatokia defendatzen du, non berrikuntza teknologiko eta sozialari esker elkarri konektatutako proiektu txikiak sortuko baitira errazagoa izan dadin konponbide iraunkorrak bilatzea.

Interesgarri gerta dakizuke:

• EEStik ekintzailetza sozialera
• Hedatzen ari da kontsumo kolaboratiboa