Microsoft Windows-ekin dabiltzan PCetan jartzeko diseinatuta dago sistema, baina sistema eragile irekiekin, Linuxekin, esate baterako, lan egiteko bertsioa garatzen ari dira dagoeneko Dinalanen. Egokitzapen horri esker, oraindik gehiago jaitsi ahal izango lituzkete salmenta automatikoko makina bakoitzaren ekipamendu-kostuak. Oso interesgarria da kostuak txikitzea salmenta-ekipo askorekin lan egin nahi denean.
Dinalanek diseinatutako produktuak, batetik, osagai elektroniko bat dauka, eta, bestetik, hari lotutako softwarea. Eta bi lekutara konektatzen da, oso erraz: PCra, USB ataka baten bidez, eta ordainketa-bideetara. Hala, MDB protokoloa darabilten makinetan txanpon-zutabeak, billete-irakurgailuak eta aurrez ordaindutako txartelak erabili ahal izango dira, eta, ccTalk protokoloa darabiltenetan, berriz, billete-irakurgailuak, aurrez ordaindutako txartelen irakurgailuak eta sailkapena eta itzultzea egiteko hautagailua dituzten tobera-sistemak jarri ahal izango dira.
Bi protokoloak batera erabiltzeko aukera ere ematen du sistemak; adibidez, ccTalk motako hautagailu baten eta itzultzaile baten konbinazio bat izatea, eta, aldi berean, MDB billete-irakurgailu bat. Gainera, aukera dago sarrera eta irteera digitalak erabiltzeko -normalak edo potentziazkoak- botoiak, sentsoreak eta alarmak irakurtzeko, led-ak aktibatzeko, bai eta motor txikiak martxan jartzeko ere.
Haien diseinuarengatik eta ezaugarriengatik, salmenta automatikoko makinetarako irtenbide horrek aukera ematen du azkar garatzeko salmenta automatikoko prototipoak eta sistemak, eta parkingetan ordaintzeko, produktuak ordaintzeko, argazkiak errebelatzeko zerbitzuak kobratzeko edo esnea salmenta automatikoko makinen bidez saltzeko.
Dinalanen sistema erosten duten bezeroek, jasotzen duten elektronikaren eta software-moduluen bidez, oso-oso erraz egin ahal izango dituzte goi-mailako funtzioak, hala nola kreditua kontsultatzea, kobratzea, ordaintzea, egoera kontsultatzea eta kontabilitatea egitea. Zerbitzu gehigarrien artean, alor horretan laguntza teknikoa emateko sail bat ere badu enpresak.
Dinalanek esperientzia handia du salmenta automatikoko sistemen alorrean, I+G proiektuak egin eta aplikazio espezifikoak garatu baititu Espainiako hainbat enpresa handirentzat. Adibidez, Ekasa enpresak merkaturatutako RETA apustu-ekipoen softwarea garatu du, esnea saltzeko makinen eta Administrazioaren formularioen ordainketa-sistemak diseinatu ditu, eta Azkoyen enpresarekin elkarlanean aritu da elektronika-proiektuetan, tabako-makinen, kafe-makinen eta edari hotzen makinen kontrol-softwarea garatzeko. Sektorearen beharrak ezagutzeak eta urteen poderioz izandako eskarmentuak aukera eman dio Dinalani banaketa- eta salmenta-makinak kontrolatzeko eta irtenbide berezitua eskaintzeko.