Albisteak

Orange enpresak dio EAE laugarren erkidegoa dela Informazio Gizartearen garapenean

Orange Fundazioak eginiko eEspaña txostenaren arabera, EAE laugarren autonomia erkidegoa da Informazio Gizartearen garapenean, aurretik dituelarik Madril, Katalunia eta Nafarroa. Lisboako Agendan ezarritako Europako konbergentziaren helburuak bakarrik aztertzen baditugu, Bizkaia, Araba eta Gipuzkoak postu hobea dute, hots, hirugarrena, EBko batez bestekotik bost puntura daudelarik.

Salmenta automatikoko makinak kontrolatzeko irtenbide malgu bat diseinatu du Dinalanek

Dinalan ingenieritza-enpresak salmenta automatikoko makinak kontrolatzeko irtenbide berritzaile bat garatu du. Eskuragarri dituzten software-liburutegiek eskaintzen duten malgutasun handiari, pertsonalizatzeko aukerari eta duten kostu lehiakorrari esker, garatutako produktua oso alternatiba interesgarria da hala prototipo gisa edo serie txikiak instalatzeko, nola makina-kopuru handiko proiektuetan jartzeko. Eskudirutan —billetez nahiz txanponez— egiten diren kobratzeak eta ordainketak tratatzeko orduan sortu ohi diren arazoak erraz konpon daitezke aplikazio horren bidez, eta erraz integra daiteke bezeroen aplikazioekin.

Frantzian neurrira eginiko altzariak sortzeko onlineko zerbitzu bat abiarazi dute

Altzariena da Interneten etorrerarekin gutxien aldatu den sektoreetako bat. IKEA enpresak tresna indartsuak eskaintzen ditu bere webean etxeko edo bulegoko dekorazioa konfiguratzeko, baina ez du Sarearen bidez saltzen. Eta Internet salmenta kanal garrantzitsu bilakatu duen beste enpresarik ere ez da sortu. Seguru asko, teoriak dioen bezala, ez delako ikusi eta ukitu gabeko altzaririk saltzen.

Telefónica etxerainoko zuntz optikoari buruzko proiektu bat prestatzen ari da Donostiako hainbat auzotan

Telefónica etxerainoko zuntz optikoaren (FTTH) potentziala probatzen ari da eta, aurreikuspenen arabera, hainbat froga abiaraziko ditu Donostiako Igara, Berio eta Zuatzu auzoetan. Eremu horietan enpresa ugari daude eta, beraz, operatzaileak espero du horrelako azpiegituren eskaera (100 megako Internet abiada eskaintzen dutenena) handia izango dela.

Cisco eta EADS enpresak aztertzen ari dira ea posible den espazioan Internet sare bat sortzea

Cisco eta EADS konpainiak aztertzen ari dira ea posible den Interneteko IP protokoloa erabiliko duten espazioko telekomunikazio sareak sortzea. Esperimentu honetan erabiliko diren router-ak gai dira datu bolumen handiak aldi berean transferitzeko lurreko hainbat hargailutara.