Azken hamabi hilabeteetan ikaragarri hazi da mugikor bidezko Internet konexioa Euskal Autonomi Erkidegoko enpresen artean. 2009an konpainien %16k baino ez zuten mugikorra erabiltzen Sarean nabigatzeko, baina gaur egun %23 dira dagoeneko, Eustatek emandako datuen arabera. Hamar langile baino gehiago dituzten enpresen artean, berriz, ratioa %40koa baino handiagoa da.
Maila orokorragoan, euskal enpresen %76k baino gehiagok dute ordenagailua eta %70 baino gehiagok
Interneterako konexioa. Kopuru horiek apenas aldatu dira, halako saturazio maila batera iritsi garelako. Web orria duten enpresa kopurua zertxobait hazi da eta %34raino iritsi da (Interneterako konexioa duten guztien artean %48 eta hamar langile baino gehiago dituztenen artean %78).
Sareko sarbideei dagokienean, berriz, mugikorretik konektatzen den enpresa kopuruaz gain, hazkunde garrantzitsua izan du baita ere kable-modem bidez konektatzen direnen multzoak, %23,5eraino hazi delarik. Interneten sartzen direnean, enpresek batez ere informazioa bilatzen dute, banku edo finantza zerbitzuak eskuratzen dituzte eta tramite administratiboak egiten dituzte.