Facebook-ek bere erabiltzaileen datuen pribatutasunaren inguruan hartu dituen azken neurriek alarma piztu dute Europako Batzordearen egoitzan. Bruselan oso kezkatuta daude zeren sare sozial nagusiak kontrolatzen dituzten enpresa gehienak AEBetan oinarrituta baitaude, eta AEBetan araudia ez da EBn bezain zorrotza.
Europako exekutiboak aholkularitza bat kontratatu nahi du aztertu dezan nola erabiltzen dituzten sare horiek 13 eta 17 urte bitarteko gazteek. Bere helburu nagusietako bat da jakitea egia den Facebook-eko fundatzaile Mark Zuckerberg-ek dioena, hots, adin txikikoen artean nabarmen aldatu dela pribatu eta publikoari buruzko pertzepzioa.
Gaztetxoen artean muga hori definitu ondoren, Europako Batzordeak sare sozial guztiak aztertu nahi ditu erabiltzaileen datu pertsonalen babesa nola bermatzen duten jakiteko. Iaz EBk akordio bat sinatu zuen merkatuko operatzaile nagusiekin, euren artean Tuenti espainiarrarekin, adin txikikoen pribatutasuna handiagotzeko.