IkerChem-ek irabazi du La Caixak sustatzen duen, Garapen Agentzien Euskal Elkarteak antolatzen duen eta Berrikuntza Enpresa Nazionalak (ENISA) beste erakunde batzuekin batera ematen duen EAEko Emprendedor XXI Sariaren laugarren edizioa. Likuid eta Nesplora izan dira beste bi finalistak, hauek ere gipuzkoarrak.
IkerChem kimikaren eta farmazeutikaren sektoreetako enpresa bat da, onkologiako tratamenduetan aplikatzen diren balio erantsi handiko entitate kimiko berriak (NCE) diseinatu eta garatzen dituena. 10.000 euroko txeke bat irabazi du eta baita ere Cambridge-ko Ignite Fast Tracking Innovation ikastaroan parte hartzeko beka bat eta munduko berrikuntza polo garrantzitsuenetako bat (AEB, Txina) bisitatzeko aukera.
Likuid-ek, bestalde, mikro-ultra eta nanoiragazketako mintz inorganikoak eta uren tratamendurako iragazketa sistemak garatu, fabrikatu eta merkaturatzen ditu. Nesplora, berriz, neurozientzien esparru zientifikoan espezializaturik dago eta portaera eta kognizioa aztertzen ditu teknika ez erasotzaileak erabiliz. EAEko 16 enpresak parte hartu dute guztira.